অষ্টাবক্র উবাচ ॥
মুক্তিমিচ্ছসি চেত্তাত বিষযান্ বিষবত্ত্যজ ।
ক্ষমার্জবদযাতোষসত্যং পীযূষবদ্ ভজ ॥ 1-2॥
ন পৃথ্বী ন জলং নাগ্নির্ন বাযুর্দ্যৌর্ন বা ভবান্ ।
এষাং সাক্ষিণমাত্মানং চিদ্রূপং বিদ্ধি মুক্তযে ॥ 1-3॥
যদি দেহং পৃথক্ কৃত্য চিতি বিশ্রাম্য তিষ্ঠসি ।
অধুনৈব সুখী শাংতো বংধমুক্তো ভবিষ্যসি ॥ 1-4॥
ন ত্বং বিপ্রাদিকো বর্ণো নাশ্রমী নাক্ষগোচরঃ ।
অসংগোঽসি নিরাকারো বিশ্বসাক্ষী সুখী ভব ॥ 1-5॥
ধর্মাধর্মৌ সুখং দুঃখং মানসানি ন তে বিভো ।
ন কর্তাসি ন ভোক্তাসি মুক্ত এবাসি সর্বদা ॥ 1-6॥
একো দ্রষ্টাসি সর্বস্য মুক্তপ্রাযোঽসি সর্বদা ।
অযমেব হি তে বংধো দ্রষ্টারং পশ্যসীতরম্ ॥ 1-7॥
অহং কর্তেত্যহংমানমহাকৃষ্ণাহিদংশিতঃ ।
নাহং কর্তেতি বিশ্বাসামৃতং পীত্বা সুখং চর ॥ 1-8॥
একো বিশুদ্ধবোধোঽহমিতি নিশ্চযবহ্নিনা ।
প্রজ্বাল্যাজ্ঞানগহনং বীতশোকঃ সুখী ভব ॥ 1-9॥
যত্র বিশ্বমিদং ভাতি কল্পিতং রজ্জুসর্পবত্ ।
আনংদপরমানংদঃ স বোধস্ত্বং সুখং ভব ॥ 1-10॥
মুক্তাভিমানী মুক্তো হি বদ্ধো বদ্ধাভিমান্যপি ।
কিংবদংতীহ সত্যেযং যা মতিঃ সা গতির্ভবেত্ ॥ 1-11॥
আত্মা সাক্ষী বিভুঃ পূর্ণ একো মুক্তশ্চিদক্রিযঃ ।
অসংগো নিঃস্পৃহঃ শাংতো ভ্রমাত্সংসারবানিব ॥ 1-12॥
কূটস্থং বোধমদ্বৈতমাত্মানং পরিভাবয ।
আভাসোঽহং ভ্রমং মুক্ত্বা ভাবং বাহ্যমথাংতরম্ ॥ 1-13॥
দেহাভিমানপাশেন চিরং বদ্ধোঽসি পুত্রক ।
বোধোঽহং জ্ঞানখড্গেন তন্নিকৃত্য সুখী ভব ॥ 1-14॥
নিঃসংগো নিষ্ক্রিযোঽসি ত্বং স্বপ্রকাশো নিরংজনঃ ।
অযমেব হি তে বংধঃ সমাধিমনুতিষ্ঠসি ॥ 1-15॥
ত্বযা ব্যাপ্তমিদং বিশ্বং ত্বযি প্রোতং যথার্থতঃ ।
শুদ্ধবুদ্ধস্বরূপস্ত্বং মা গমঃ ক্ষুদ্রচিত্ততাম্ ॥ 1-16॥
নিরপেক্ষো নির্বিকারো নির্ভরঃ শীতলাশযঃ ।
অগাধবুদ্ধিরক্ষুব্ধো ভব চিন্মাত্রবাসনঃ ॥ 1-17॥
সাকারমনৃতং বিদ্ধি নিরাকারং তু নিশ্চলম্ ।
এতত্তত্ত্বোপদেশেন ন পুনর্ভবসংভবঃ ॥ 1-18॥
যথৈবাদর্শমধ্যস্থে রূপেঽংতঃ পরিতস্তু সঃ ।
তথৈবাঽস্মিন্ শরীরেঽংতঃ পরিতঃ পরমেশ্বরঃ ॥ 1-19॥
একং সর্বগতং ব্যোম বহিরংতর্যথা ঘটে ।
নিত্যং নিরংতরং ব্রহ্ম সর্বভূতগণে তথা ॥ 1-20॥
